„REČ V SPOMEN ZAKLEJENA”

POKOTURNI MI ŽIVLJENJE
(Blok: Pokoturni mi življenje)

Pokoturni mi življenje kaj mi srce išče:
jen drobiždžek pretekloga
v njem stàro dvorišče
i rođenu hižu od zdàvja podrtu
i kre potnih vràti lesu sem svétu otprtu.

I kaj z groba zvlečeju se si v kištrami zaprti
kaj na stolu blesikneju kak snég béli stolnjaki prestrti
kaj se koli stola zbere mà rodbina céla
kaj bu hiža kak negda z sméhom
srečna i vesela
i kaj brati
vujci
strici
v zràk zdigneju čaše
za mir vu svétu i v čoveku
i za zdràvje naše
i kaj se betegu sakom zatrgneju tràgi
i kaj v peklu zacvrčiju si odbegli vràgi
i kaj se nesreča nigdàr z sveg mesta ne gene
i kaj se smrt več nigdàr
pred čoveka ne podene
i kaj Božek makar jempot pogledne me v joči
i šepne mi po skrivečki kak doseči moči
kaj po svétu samo mléko z slotkim medom teklo
i kaj mene za sakom zbeglom
več nej v srcu peklo…

I makar bi išče mev kaj takvoga za reči
itak bom zabrénzav —
ne bi rad kaj z preveč réči prerekev se sreči
ali kaj bi se
sê zrečeno
pri Božeku pàcalo
da je itak najvažnejše i v ovu molitvu stàlo.

GASTARBAJTERSKI ŠPIGELJ
(Blok: Gasterbajeterski žpigelj)

Bilo je to v vréme
da se sreča z céla zapičila v pések
a jà
sega željen
vu béli se svét zatirav.

f časi se bom vrnuv
na réč sam si vervav spovedanu v špigelj
z déna v dén pred rokom
kà je v pràznomu žepu kàzala mi figu.

Ma né mi je treba blàgo célog svéta
brundav sam si v bràdu
nebom prodav dušu za réč ku ne razmem;
nečem smeh ni podsmeh ki se v stranjskom svétu
z nesmiljenoga braza
kak z fašničke làfre scéja.

Bàjav sam si v špigelj išče kaj-kaj toga
dokač so črez dneve rudala se léta
vu tém dalkom svétu
v šteromu mali čovek
i se druge réči pod zastavom bélom nosi.

„Ljubi roku kà te hràni!“
curikali so japa z groba
z svoje kmice moju kmicu
v zemlju trli boli duše
z mučečima réči žmereli na špigelj
ki je več i z glažom kàzav
kaj življenja zvono
več i ober mene na tenkoma klenka.

Al vera je pesem z niti senje stkàna:
kontra japi v grobu
kontra figi v žepu
do zàdjega je v špigelj hrànila mi dušu —
kaj sam jà né gastarbajter
i kaj se bom kak i v senji nazàj vrnuv dimo.

I jesam se vrnuv
po sreči se domaj našev
da so i po mene došli
si nebeski zbori:
podeli se z mira Božjeg
i praf onak kak se šika
da se mlàdenca za navék otpràvlja —
z mlodom pucom kak z smrtičkom
kak z mlàdenkom v belini.

KAŠA Z HUDIH MISELI
(Blok: Kaša z hudih miseli)

Splele so se hude misli
i z čemernim prstom zapičile vu me
vu dušu i srce
v ufanja i nàde
v korake i roke
i več mi ni réč
vu pesem né štela.

I nes’ pitav čemu scofutano sonce
čemu kup haljinja z sposušenoga cvétja
čemu črni ΄blaki zmešani vu kašu.

„Žeri!“– zarežav je prst pred vuhom
zagledan vu kašu.
Saku i najmenjšu droptu petsto pot sprekoši
i stopram ju unda na trdoma pogotni!

I jà sam posljuhnuv —
kosav sam i kosav
kosav i pogàtav
z jenim jokom mériv
sreču dzoj za voglom
z drugim nàve dneve
se na red bez zutra.

Mortik jih se réšim
ak se réšim kaše
ak je to pokora
té čmelinjak v glàvi
ki ràste kak kvàs
na toplomu postàvljen
kak oblak bez dežđa
ki prehàja mimo.

Z mira Božjeg se je podev
tak lépi
tak béli
kak blazina mefki
i dalko od kaše.

I praf tu
pred menom
i otprtim blokom
na domàči cirkvi
pri tretjemu turnu.